index introductio imagines || partitura exemplar translatio

bibliographia e-mail

CTH 443.1

Exemplar --

Citatio: S. Görke (ed.), hethiter.net/: CTH 443.1 (Expl. --, 11.12.2013)

§ 1

1 -- [mā]n išḫanāš DUTU-un DIM-n=a EGIR-pa lilānzi

2 -- [nu k]ī danzi

3 -- 2 kurdāli išnaš

4 -- nu=ššan kēdani 7 EME išnaš išḫuwān

5 -- kēdani=ya=ššan 7 EME išnaš išḫuwanteš

6 -- Ì.UDU wakšur LÀL wakšur 2 SÍLA 20 tūruppaš 1 SÂTU ZÌ.DA ZÍZ

7 -- n=at ḫaršaš dāi

8 -- 1 UR.TUR 7 qalulupuš išnaš 7 išḫaḫru išnaš

9 -- n=at=šan paddani išḫuwān

10 -- 1 SÍGšūil GAD

§ 2

11 -- KÙ.BABBAR GUŠKIN NA₄ZA.GÌN NA₄KÁ.DINGIR.RA NA₄parašḫaš NA₄DUḪ.ŠÚ.A lulluri AN.NA URUDU kuitta parā tepu dāi

12 -- 1-NŪTUM GIŠ.ÉRIN ZI.BA.NA ŠA GIŠ dāi

13 -- 40 ALAMḪI.A GIŠ 4 GIŠGIGIR TUR 6 GIŠGIGIR ašannaš 1 GIŠGIGIR āšnateyauwaš 5 DUGGAL 2 DUGKUKUBŪ TUR 1 DUGḫaniššaš GEŠTIN

14 -- nu kī ḫandāizzi

§ 3

15 -- [nu]=kan anda INA É BĒLI pedanzi

16 -- nu 1 kurdāli išnāš [Q]ADU EMEḪI.A dāi

17 -- nu kiššan memai

19 -- [ki]nun=a idālauēš EMEḪI.A

20 -- nu=war=at=kan iššaz kuedani [x]xx-ta fZi.

21 -- kinun=a=wa ANA fZi. addeš=šeš palḫāēš

22 -- [tu]ēkkēš=šeš SIG5-anteš mišriwanteš

23 -- aiš apel [SIG5-]in

24 -- EME apel SIG5-anza

25 -- nu idālu kue ITT[I] mDutḫaliya [U] fNikalmāti ANA DUMUMEŠ=ŠUNU mēmiškit

26 -- nu=šmaš EMEḪI.A [išš]išta

27 -- n=uš=kan išḫanāš DUTU-i DIM-ni parānta [idāl]u memiškit

28 -- n=uš alwanzaḫḫiškit

§ 4

29 -- [nu q]āša išḫanaš DUTU-un DIM-ann=a EGIR-pa lilāriškiwan[i]

30 -- [kē] i[d]ālauēš EMEḪI.A ḫatešdānteš

31 -- nu EGIR-pa fZi. [QAD]U DUMUME[Š=Š]U ḫarkandu

32 -- šer SAG.DU=SU ḫarkandu

33 -- ŠÀ=ŠU genzu=šet [k]ēnu=ššet QĀTĪ=ŠU GÌRḪI.A=ŠU ḫarkandu

34 -- nu=ššan ANA ŠEŠ=ŠU [ku]e takkiškit

35 -- n=at=kan ANA BĒLĪ QADU DAM=ŠU DUMUMEŠ=ŠU arḫa [l]ilarišk[i]wani

36 -- nu kē idālauēš EMEḪI.A EGIR-pa fZi. [QAD]U DUMUMEŠ=ŠU ḫa[rka]ndu

§ 5

37 -- [ … ] kurtali=ma=ššan QADU EMEḪI.A

38 -- nu=ššan šer Ì LÀL laḫ[ui]

39 -- nu kiššan m[e]mai

40 -- qāša idālamuš alwanzinnu[š] EMEḪI.A

41 -- fZi.-aš [ku]iuš iššišta

42 -- n=uš=šan qāša anda LÀL-t[i d]āiuen

43 -- nu išḫanāš DUTU-uš DIM-ašš=a galankanteš ēšte[n]

44 -- nu kē idālauēš alwanzinneš EME[ḪI.A waḫ]andu BĒL[Ī] QADU DAM=ŠU DUMUMEŠ=ŠU É=SU

45 -- nu fZi.-aš QAD[U DUMUMEŠ=ŠU ḫarkan]du

46 -- ANA BĒLĪ=ma DAM=ŠU DUMUMEŠ=ŠU TI-tar ḫašt[iliyatar] mayandatar piškandu

47 -- nu=šši DINGIRMEŠ.ḪI.A ␣␣GIŠ[TUK]UL parā neantan piandu

48 -- [nu=z]a ḫāššuš ḫanzaššuš k[a]rapdu

49 -- nu=za=kan KUR-e ḫaššikdu

§ 6

50 -- [ … ]x ALAMḪI.A [ … ] išqāri

51 -- nu kiššan memai

52 -- [ … ] x-ša qāša fZi. ANA BĒLĪ ANA DAM=ŠU DUMUMEŠ=[Š]U [idalamuš alwanzinn]uš EMEḪI.A

53 -- kuiuš iššišta

54 -- [ … ]

55 -- [ AN]A DUMU.NITALÚmayanduš [ … ]

56 -- [ … -]nduš xxx[ … ]

57 -- [ … ] xxxx [ … ]

§ 7'

58 -- nu AL[AM]ḪI.A [pedi=šmi=pat p]ēdumen

59 -- n=uš dametani NA₄p[er]uni kattan išqarir

60 -- nu išnaš kurtāli Ì LÀL kuwāpi lāḫuwan

61 -- n=at=šan NA₄peruni dāi

62 -- nu 3 [NI]NDA.GUR4.RA TUR paršiya

63 -- GEŠTIN šipanti

64 -- nu kiššan memai

65 -- k[ī] NA₄pēru māḫḫan uktūri

66 -- BĒLU U DAM=SU DUM[UMEŠ=Š]U QĀTAMMA uktūrieš ašandu

67 -- nu GIŠTUKUL=ŠU parā nēanza ēš[t]u

68 -- nu=kan tūruppan GEŠTIN-it šipanti

§ 8'

69 -- nu k[i]ššan memai

70 -- aiš EME-aš gagāš qāša=šmaš=kan parku[i]n mišriwantan ḫarkin GIŠGIDRU UL walḫantan UDU-u[n] šipantaḫḫun

71 -- nu idālu arḫa namma peššiyaten

72 -- nu [AN]A BĒLĪ QADU DAM=ŠU DUMUMEŠ=ŠU āššu memiškiten

§ 9'

73 -- [nu QAD]U kurdāli idālamuš EMEḪI.A arḫa šuḫḫair

74 -- [nu k]iššan mēmir

75 -- kē māḫḫan ḫarkanzi

76 -- [fZ]i.-š=a BĒLAM QADU DAM=ŠU DUMUM[EŠ=Š]U kuit iššišta

77 -- [nu Š]A fZi. alwanzatar=šet idālu uddār=šet QĀTAMMA [ḫara]kdu

78 -- n=at=apa EGIR-pa lē uizzi

§ 10'

79 -- n[u l]aḫḫurnuzi tagān dāi

80 -- nu 3 NINDA.GUR4.RA išḫanaš DUTU-i DUTU-wašš=a DINGIR.LÚMEŠ paršiyat

81 -- nu=kan tūruppan GEŠTIN šipanti

82 -- n[u t]ezzi

83 -- DUTU-uš DUTU-waš DINGIR.LÚMEŠ qāša=šmaš kardimiyattaš ḫ[arš]in piḫḫun

84 -- nu=ššan kuit fZi. ANA BĒLĪ [ta]kkiškit

85 -- n=at=šan EGIR-pa apedani takšan ēštu

§ 11'

86 -- U ANA DIM U DINGIR.LÚMEŠ 3 NINDA.GUR4.RA tūruppann=a QĀTAMMA šipanti

87 -- memai QĀTAMMA

88 -- nu tūruppuš ḫappinit zanuzi

89 -- n=uš arḫa tuḫšannai

90 -- nu ANA DIM U DINGIR.LÚMEŠ=ŠU ANA DUTU U DINGIR.LÚMEŠ=ŠU peran zikizzi

91 -- nu kiššan mēmiškizzi

92 -- DUTU-uš DUTU-waš DINGIR.LÚMEŠ DIM DIM-naš DINGIR.LÚMEŠ kūš tuḫšumen

93 -- [n]=at arḫa tuḫšan ēštu ŠA fZi. idālu uttar alwanzatar

94 -- [n]=at EGIR-pa ANA fZi.=pat w[aḫ]ān ēštu

95 -- nu laḫḫurnuzi [Q]ADU NINDA.GUR4.RAḪI.A tūrupušš=a šarā dāi

96 -- n=uš PĀNĪ ALAMḪI.A dā[i]

§ 12'

97 -- nu n[amma la]ḫḫurnuzi tamai dāīr

98 -- nu namma NINDA.GUR4.RAḪI.A tū[r]upušš=a QĀTAMMA šipanter

99 -- nu kiššan memir

100 -- išḫanaš DUTU-[u]š DIM-aš DINGIR.LÚMEŠ-š=a qāša=šmaš aššulaš NINDA.GUR4.RAḪI.A paršiyanun

101 -- nu i[d]ā[l]u ḫarnikten

102 -- nu ANA BĒLĪ ANA DAM=ŠU DUMUMEŠ=ŠU āššu namma ēšt[u]

103 -- [nu]=šši DUTU-uš DIM-ašš=a ANA BĒ[L]I ANA DAM=ŠU DUMUMEŠ=ŠU āššu TI-tar mayandatar GIŠTUKUL parā nēantan [na]m[m]a piškatten

§ 13'

104 -- nu laḫḫurnuzi šarā dāir

105 -- n=at PĀNĪ ALAMḪI.A daī[r]

106 -- nu namma laḫḫurnuzi daīr

107 -- nu NINDA.GUR4.RAḪI.A tūruppu[š] takšulaš DUTU-i DIM-ni DINGIR.LÚMEŠ QĀTAMMA šipanter

108 -- nu kiššan [mē]mir

109 -- išḫanāš DUTU-uš DIM-aš DINGIR.LÚMEŠ [qā]ša=šmaš takšulaš ḫa[r]šin paršiyanun

110 -- nu ITTI BĒLĪ QADU DA[M=Š]U DUMUMEŠ=ŠU takšulat[te]n

§ 14'

111 -- [nu=šš]an ANA GIŠ.ÉRIN KÙ.BABBAR GUŠKIN NA4ḪI.A x-x-x-x išḫuwāi

112 -- nu [DUTU-i mēnaḫḫ]anta 6-ŠU gankir

113 -- nu k[i]š[š]an memi[r]

114 -- [išḫanaš DUTU-]uš DIM-aš qāša=šmaš=(š)ta B[Ē]L[U] QADU DAM=[Š]U DUMUMEŠ=ŠU

115 -- [išḫanaš DUTU-]uš DIM-aš galankanteš [ēšt]en

116 -- nu paḫši [ … -u]š anda lē kuitki anda

117 -- nu tak[š]ulaš [ḫaršin … ]x daīr

118 -- nu=ššan KÙ.BABBAR GUŠKIN NA4ḪI.A [ … ]

119 -- [n]=at=šan pedi=šmi=pat dāli[r]

§ 15'

120 -- [ … mēmi]šta

121 -- DUTU-uš DIM-ašš=a [ … ]

122 -- [ … ] xxx [ … ]x 1 SÍLA x[ … ]

123 -- [ … ]-ir

124 -- nu=ššan x-x-ḫar [ … ]

125 -- [nu kišša]n mēmišta

§ 16'

126 -- [išḫanaš DUTU-uš DIM-aš qāš]a=šmaš karšešnaš [ḫaršin paršiyanun]

127 -- [ … t]erippianzi

128 -- n=at [ … ] Ì ZÍZ-tarr=a arḫa dumēni

129 -- [ … -e]n

130 -- n=ašta arḫa ŠA BĒLĪ [ … ]

131 -- [ … ḫā]ššuš ḫanzaššuš dāuen

132 -- [ … ]

133 -- [nu=]šši=kan EGIR-an arḫa namma [ … ]

134 -- [ … šā]k

135 -- BĒLAM-ma=z lē namma šākti

§ 17'

136 -- [ … ]-x UZUZ[AG.U]DU ḫappinit zanuanzi

137 -- [ … ]-x apūš=a SÍLA-uš QADU=ia [ … ]

138 -- [n=a]t laḫḫurnuzi ḫašši [daīr]

139 -- [n=at arḫa w]arnuir

§ 18'

140 -- [ … ]-x-rir

141 -- nu UR.TUR arḫa [k]uerir

142 -- [ … ]x-ianniš

143 -- QATI

§ 19'

144 -- [mān … E]GIR-pa lilānzi

145 -- [nu kī danzi]

146 -- [1 SÍGpittūla]š ZA.GÌN 1 SÍGpittūlaš SA5 [ 1 SÍGpittūlaš BABBAR 1 SÍGpittūlaš G]E6 1 SÍGpittūlaš SIG7.SIG7 [ … ] x ŠAḪ.TUR Ì.UDU wakšur [LÀL wakšur … ] x 5 DUGGAL 2 DUGKUKUBŪ TUR [ … ]

147 -- [n=at=š]an kuwāpitta [ … ]-x aranta

148 -- [ … ]-x šanḫuan[zi]

§ 20'

149 -- [ … k]uiuš d[āi]

§ 21''

150 -- [ … ] x x[ … ]

151 -- [ … ] x [ … ]

152 -- [ … ] x [ … ]

153 -- [ … fZ]i. ANA BĒ[LĪ DAM=ŠU DUMUMEŠ=ŠU … ]

154 -- [ … -i]ttiyan[ … ]

§ 22''

155 -- [ …-]andan li[- … ]

156 -- [ … qāš]a?-a=šši=kan šarā [ … ]x-un? ␣␣

157 -- [ … tuḫš]annaḫḫun

158 -- [U ŠA fZ]i. [ … Q]ĀTAMMA tuḫšan ē[št]u

159 -- [ … ]x tuḫšann[ā]i=ma

160 -- [ … -]iškizzi

§ 23''

161 -- [ … -i]š

162 -- nu kiššan [memiškizzi]

163 -- [nu=ššan kue fZi.] ANA DAM BĒLĪ takkiškit

164 -- [n=at=kan ANA BĒLĪ DAM=ŠU DUMUMEŠ=ŠU arḫa l]ilāriškiwani

165 -- [ … -]tiyanniweni

166 -- [ … takk]iškit

167 -- n=at=šan [ … takš]an ēštu

168 -- [ … tuḫšann]aḫḫun

169 -- U ŠA fZi. [ … t]uḫšan ēštu

170 -- [ … ]

171 -- [nu EGIR-pa fZi. QADU D]UMUMEŠ=ŠU ḫardu

172 -- n=at=šan paddani dāi

§ 24''

173 -- [ …-n]ai

174 -- nu kiššan memiškizi

175 -- [ … t]akkiškit

176 -- n[=at=ma=k]an [ … ]

177 -- n=at=šan AN[A … fZ]i. [ … ]

178 -- [ … ]x paddani d[āi]

§ 25''

179 -- [ … ]anna-[ … ]

180 -- [ … ]fAšmuḫepa [ … ]

181 -- [n]=at=šan paddani dāi

§ 26''

182 -- [ … ALAMḪI.A i]šqāri

183 -- nu kišš[an memai]

184 -- [ … qāša fZ]i. ANA BĒLĪ DAM=ŠU [DUMUMEŠ=ŠU idalamuš alwanzin]nuš EMEḪI.A

185 -- kuiu[š iššišta]

186 -- [ … ANA B]ĒLĪ ANA DAM=ŠU DUMUMEŠ=[ŠU]

187 -- [ … ] mišriwandu[š] [ … ]

188 -- [ … -e]n

189 -- nu tarnandu mDu[tḫ]aliyan [ … ]

190 -- [nu EGIR-pa fZi. QA]DU DUMUMEŠ=ŠU ḫarkandu

§ 27''

191 -- [nu ANA BĒLĪ DAM=ŠU DUMUMEŠ=ŠU TI-ta]r dalugauš MUKAM_uš [ḫaštiliyatar mayandatar] piškandu

192 -- nu=šši [DINGIRMEŠ.ḪI.A GIŠTUKUL parā nēanta]n piandu

193 -- nu=za ḫāššuš [ḫanzaššuš karpandu]

194 -- [nu=z]a=kan KUR-e ḫaššikandu

195 -- [ … ḫaš]šikdu

§ 28''

196 -- [ … šar]ā dāi

197 -- nu=kan ÉḪI.A [ … ]

198 -- [E]GIR-anda=ma=kan UR.TUR [ … a]nda waršanzi

199 -- nu ḫāššuš [ … ] xxx pedanzi

200 -- n[u-… -z]a [ … ]x-anzi

201 -- nu katta daīr

§ 29''

202 -- [ … ]x patter

203 -- nu=kan ALAMḪI.A šanḫuiz[zi]

204 -- [ … kat]ta daīr

205 -- anda=ma=at UL ḫā[ri]r

206 -- [ … ]x dāīr

207 -- nu 1 kurdali Ì LÀL kuwāpi [lāḫuwan]

208 -- n=at NA₄pēruni dāi

209 -- peran katta=ma laḫḫurnuzi [dāi]

210 -- [nu 3] NINDA.GUR4.RA paršiya

211 -- nu=kan 1 PÍŠgapirtan šipanti

212 -- [nu kišš]an memai

213 -- aiš EME-aš gagaš šumeš azzikiten

§ 30''

214 -- [nu kī NA₄p]ēru māḫḫan uktūri

215 -- nu BĒLU U DAM=ZU DUMUMEŠ=ŠU [QĀTAMMA ukt]ūrieš ašandu

216 -- nu idālu arḫa peššiatten

217 -- [nu ŠA BĒL]Ī QADU DAM=ŠU DUMUMEŠ=ŠU āššu namma memiškiten

218 -- [idāl]amūš=a EMEḪI.A QADU ␣␣kurdali arḫa [š]uḫḫāir

219 -- nu kiššan memir

220 -- kē māḫḫan ḫarkanzi

§ 31''

221 -- fZi.-š=a BĒLAM QADU DAM=ŠU DUMUMEŠ=ŠU kuit iššišta

222 -- nu ŠA fZi. alwanzatar=šet idālu uddār=šet QĀTAMMA ḫarakdu

223 -- n=at=apa EGIR-pa lē uizzi

224 -- PÍŠgapirtan=a=kan kuin ANA DÙ EME šipantaš

225 -- nu UZUNÍG.GIG UZUZAG.UDU ḫappinit zanuzi

226 -- n=at=šan NA₄pēruni=pat dālai

227 -- PÍŠgapirtann=a=ššan ḫaššī dāi

228 -- n=an arḫa warnuzi

§ 32''

229 -- EGIR-pa=ma 3 pēdan laḫḫurnuzi daiš

230 -- nu linkiyaš DIM U DINGIR.LÚMEŠ=ŠU 3 NINDA.GUR4.RA paršiat

231 -- nu=kan PÍŠgapirtan šipandaš

232 -- nu=ššan ēšḫar ḫaršaš šer tarnaš

233 -- EGIR-pa=ma ANA DUTU U DINGIR.LÚMEŠ=ŠU 3 NINDA.GUR4.RA paršiat

234 -- nu=kan PÍŠgapirtan šipandaš

235 -- nu=ššan ēšḫar ḫaršaš šer tarnaš

236 -- EGIR-pa=ma nepišaš DIM-ni U DINGIR.LÚMEŠ=ŠU 3 NINDA.GUR4.RA paršiyat

237 -- nu=kan PÍŠgapirtan šipandaš

238 -- nu=ššan ēšḫar [ḫa]ršaš šer tarnaš

239 -- nu šuppa UZUNÍG.GIGḪI.A UZUZAG.UDUḪI.A ḫappinit zanuir

§ 33'''

240 -- [ … ]

§ 34'''

241 -- mān ḫal-x [ … ]

242 -- ŠU mŠUKUR-anza [ … ]