index introductio imagines || partitura exemplar translatio

e-mail

CTH 376.1

Exemplar --

Citatio: E. Rieken et al. (ed.), hethiter.net/: CTH 376.1 (Expl. --, 02.12.2017)

§ 1'

1 -- [ ... ]

2 -- uyaet=mu [mmu]ršil[iš ... ]

3 -- [ ... ]

4 -- īt=wa ammel ANA BE[LTI-YA ... ANA dUTU UR]Uarinna memi

5 -- nu=wa dUTU UR[Uarinna ... ŠA S]AG.DU-YA mugāmi

6 -- nu=z(a)=ka[n ... nakk]iš dUTU URUarinna nepiš[i ... ] šer

7 -- mān=z(a) aruni

8 -- mān=z(a) AN[A ḪUR.SAGMEŠ … ]-qa waḫḫanna pān[z(a)]

9 -- [kinun]a=tta GIŠERIN-anz(a) Ì-[ ... ]-du

10 -- nu=tt[a ... ]-ašš=a Š[A ... ]

11 -- [ … EGI]R-pa Ékarimm[i … ]

12 -- [ … kāš]a m[ukiškem]i NINDAḫaršit [ … ]

13 -- [ … kal]anganz(a) ēš

14 -- [ ... išt]amaški

§ 2'

15 -- [ … nakki]š DINGIR-LIM-iš

16 -- [ … INA KU]R URUKÙ.BABBAR-ti taššanuwan

17 -- [ … ] É.DINGIR-LIM-KA [ … ]

18 -- [nu]=t[t]a EZEN4ḪI.A SÍSKURḪI.A=ya [ … parkw]i peškanzi

19 -- [ … utn]ē UL kuwapikki peškanzi

20 -- [ … I]ŠTU KÙ.BABBAR GUŠKIN [ … ] ēšzi

21 -- namma=ma=at=ta [ … UL kuwapi]kki ēšzi

22 -- [ … KÙ.BABBAR.G]I41 NA4ḪI.A INA KUR URUKÙ.BABBAR-ti=pat [ … ]

23 -- [ … IT]UḪI.A MU-ti mīyanaš [ … gimmant]aš ḫamešḫandaš auliuš m[ukišnašš=a EZ]EN4ḪI.A IN[A KUR U]RUKÙ.BABBAR-ti=pat ēššanzi

24 -- namm[a]=ma[=at=ta] tamēdani KUR-e UL kuwapikki ēšš[a]nzi

§ 3'

25 -- nu tuel ŠA dUTU URUarinna DINGIR-LIM-yatar INA KUR URUḫatti=pat nakkiyaḫḫan

26 -- nu=tta=kkan mmurši-DINGIR-LIM-iš LUGAL-uš ARAD-KA INA KUR URUKÙ.BABBAR-ti=pat naḫḫanz(a)

27 -- nu tuel ŠA dUTU URUarinna ḫimmuš SÍSKURḪI.A EZEN4ḪI.A iyauwanzi šarā tittanuškanzi

28 -- nu=tta ḫūman parkwi peškanzi

29 -- namma=ššan É.DINGIR-LIM-KA ANA KÙ.BABBAR GUŠKIN naḫšaraz tiyanz(a)

30 -- nu maninkuwan UL kwiški tiyazzi

§ 4'

31 -- zik=z(a) dUTU URUarinna nakkiš DINGIR-LIM-iš

32 -- nu=tta=kkan ŠUM-an lamnaš ištarna nakkī

33 -- DINGIR-LIM-yatar=ma=ta=kkan DINGIRMEŠ-aš ištarna nakkī

34 -- namma=z(a)=kan DINGIRMEŠ-aš ištarna zik=pat dUTU URUarinna nakkiš

35 -- šallešš=a=z zik=pat dUTU URUarinna

36 -- namma=ta=kkan damāiš DINGIR-LUM nakkiš šallišš=a UL ēšzi

37 -- ḫantandaš=a=z [ḫa]nnešnaš EN-aš zik=pat

38 -- nepišašš=a [takn]ašš=a LUGAL-weznatar zik=pat dudduškeši

39 -- [ ... ]=kan ZAGḪI.A-uš zik=pat zikkeši

40 -- [mug]auwarr=a zik=pat ištamaškeši

41 -- [zi]k=pat=z(a) dUTU URUarinna gi[n]zuwalaš DINGIR-LUM zi[k]

42 -- nu ginzu zik=pat daškeši

43 -- parā ḫandanz(a)š=a=kan antuwaḫḫaš tuk=pat ANA dUTU [UR]Uarinna ašiyanz(a)

44 -- n=an zik=pat dUTU URUarinna [ša]rleškeši

45 -- nepišašš=a=z(a) taknašš=a ḫūlalēšni zik=pat dUTU URUarinna lalukk[im]aš

46 -- KUR.KURḪI.A-š=a=z(a)=kan ištarna zik=pat ašš[anuw]anz(a) DINGIR-LIM-iš

47 -- nu=z(a) KUR-eaš ḫūmandaš attaš annaš zik

48 -- ḫannešnaš=a=z parā ḫandanz(a) EN-aš zik

49 -- nu=tta ḫannešnaš pedi tarriyašḫaš NU.GÁL

50 -- karuwiliyaš=a=z(a)=kan DINGIRMEŠ-aš ištarna zik=pat aššanuwanz(a)

51 -- DINGIRMEŠ-našš=a=ššan SÍSKURḪI.A zik=pat dUTU URUarinna zikkeši

52 -- karuwiliyaš=a=ššan DINGIRMEŠ-naš ḪA.LA-ŠUNU zik=pat zikkeši

53 -- ne[p]išašš=a GIŠIG EGIR-pa tuk=pat ḫaškanzi

54 -- [nu=ka]n [n]epi[šaš] KÁ-uš zik=pat aššanuwanz(a) [ ... ša]rrišketta

55 -- nepišašš=a [ ... tu]k=pat ANA dUTU URUarinna [ ... ]

56 -- [ ... ] dUTU URUarinna memieškeši

57 -- [ ... URUari]nna aruwišk[anzi]

§ 5''

58 -- [ant]uḫši=ya=z(a)=kan kwedani DINGIRMEŠ [ ... ]

59 -- [n]=an=šan arḫa paškuwanz[i]

60 -- [z]ik=pat dUTU URUarinna ge[nzu? ...]

61 -- [k]inuna mmurši-DINGIR-LIM-in LUGAL-un dUTU URUar[inna l]uluwāi

62 -- nu mmurši-DINGIR-LIM-in LUGAL-[u]n ḫanda[ntan] ARAD-KA dUTU URUarinna kiššart(a) ḫar(a)[k]

63 -- nu=tta mmurši-DINGIR-LIM-iš LUGAL-uš uddār kwe memieškezzi

64 -- nu dUTU URUarinna GEŠTU-[an] parā l[ag]ān ḫar(a)k

65 -- n=at ištamaški

§ 6''

66 -- kī DINGIRME[Š kwit] i[y]atten

67 -- nu ḫinkan tarna[tten]

68 -- nu KUR URUKÙ.BABBAR-t[i ḫūm]an=pat BA.ÚŠ

69 -- namma ANA D[INGIRMEŠ] NINDAḫaršin [DUGišp]anduzi=ya UL kwiški iyazi

70 -- LÚ.M[EŠAPIN.L]Á A.ŠÀ A.GÀRḪI.A DINGIR-LIM kwiē[š] annešker

71 -- n=at eker

72 -- nu namma A.ŠÀ A.G[À]R DINGIR-LIM [ … ] aniyanzi

73 -- w[a]r(a)ššanzi UL kwiški

74 -- MUNUSMEŠ NA4ARA5 ŠA DINGIRMEŠ NINDA.GUR4.RAḪI.A kwiēš mallešker

75 -- n=at eker

76 -- nu namma NINDA.GUR4.RA UL kwiški mallezi

77 -- UDUauliūš=kan GU4ḪI.A UDUḪI.A ḫāliyaz ašaunaz kwēzz=aš kar(a)šker

78 -- nu [LÚ.MEŠSIPA.G]U4 LÚ.MEŠSIPA.UDU eker

79 -- ḫāli=ya ašāuwa[r ... =p]at

80 -- nu wezzi ANA DINGIRMEŠ NINDA.GUR4.RAḪI.A DUGišpant[uzz]i UDUauliušš=a karšandari

81 -- nu=nnaš uwatteni DINGIRMEŠ apēdani uddānī wašduli ḫarteni

82 -- n=ašta ANA DUMU.LÚ.U19.LU ḫattatar=šummit ḫar(a)[kt]a

83 -- nu ZAG-an kwit iyaweni

84 -- n=at NU.GÁL

85 -- nu DINGIRMEŠ kwit waštul uškatteni

86 -- nu naššu DINGIRMEŠ-niyanz(a) weddu

87 -- n=at memau

88 -- našma=at MUNUS.MEŠŠU.GI LÚ.MEŠAZU LÚ.MEŠMUŠEN.DÙ memiyandu

89 -- našma=at zašḫiyaz DUMU.LÚ.U19.LU aušdu

90 -- n=ašta URUDUZI.KIN.BAR-aš GIŠšarpaz kunkuwēn

91 -- nu DINGIRMEŠ ANA KUR URUKÙ.BABBAR-ti genzu namma tatten

92 -- kēzz=at ḫingananz(a) tamašta

93 -- kēzz(a)=ma=at kururanz(a) tamašta

94 -- nu kuriwanaš KUR.KURMEŠ kwe araḫzanda

95 -- KUR URUmittanni KUR URUarzauwa

96 -- nu ḫūmanz(a) šullēt

97 -- nu=z(a)=kan DINGIRMEŠ šarā UL iyanzi

98 -- n=ašta NIEŠ DINGIRMEŠ šarreškanzi

99 -- [n]u KUR URUḫatti idālauwanni šanḫiš[k]anzi

100 -- ÉḪI.A.DINGIRMEŠ=ma lauwarruna šanḫiškanzi

101 -- n=at ANA DINGIRMEŠ kattawātar namma kišaru

102 -- nu=ššan ḫinkan kurur gaštan idālun tapaššan ANA KUR URUmittanni Ù ANA KUR URUarzauwa tarnatten

103 -- waršanda šullanda KUR.KURḪI.A

104 -- ANA KUR URUKÙ.BABBAR-ti=ma tariyan KUR-e

105 -- nu tariyandan lātten

106 -- waršiyandan=ma tūriyatten

§ 7''

107 -- [k]ē=ma namma ŠA KUR URUḫatti=pat KUR.KURḪI.A-TIM KUR URUgašga

108 -- [n]=at LÚ.MEŠSIPA.ŠAḪ Ù LÚ.MEŠEPIŠ GADA ešer

109 -- Ù KUR URUarawanna KUR URUkalašma KUR URUluqqa KUR URUpetašša

110 -- n=ašta kē=ya KUR.KURḪI.A-TIM ANA dUTU URUarinna arawēšta

111 -- nu argamuš arḫa pēššer

112 -- nu EGIR-pa KUR URUḫatti GUL-ḫanniyauwan d[ā]er

113 -- karū=ya [KUR U]RUKÙ.BABBAR-ti IŠTU dUTU URUarinna araḫzenaš A[N]A KUR.KURḪI.A-TIM UR.MAḪ mān šarḫišket

114 -- nu parā URUḫalpan URUKÁ.DINGIR.RA-an kwiuš ḫarninkišket

115 -- nu KUR-eaš ḫūmandaš [āšš]u KÙ.BABBAR GUŠKIN DINGIRMEŠ=y[a] da-[ ... ]

116 -- n=at PANI dUTU URUarinna [zikk]er

§ 8''

117 -- kinuna araḫzenanteš udneanteš ḫūmanteš KUR URUKÙ.BABBAR-ti [w]al[ḫ]annieškeuwan dāer

118 -- n=at ANA dUTU URUarinna kattawātar namma kišāru

119 -- nu=z(a) DINGIR-LUM tuel ŠUM-KA <lē> tepšanuši

§ 9''

120 -- nu ANA DINGIRMEŠ kwiš karpiš kartimmiyaz

121 -- kwiš DINGIRMEŠ-naš UL naḫḫanz(a)

122 -- n=ašta lē āššawēš idālauwaš anda ḫarkanzi

123 -- n=aš mān 1-EN URUKI

124 -- našma=at 1-[EN … ] našma 1-EN LÚ

125 -- nu DINGIRMEŠ apūn=pat 1-an ḫarn[ikten]

126 -- KUR URUKÙ.BABBAR-ti=ma=ašta DINGIR[MEŠ … SIG5-i]t IGIḪI.A-it aušten

127 -- idālu=ma ḫinkan [ … ] utnē[aš p]eš<t>en

§ 10''

128 -- INA KUR URUhatti=ma [ … šešd]u

129 -- nu KUR URUḫatti EGIR-pa k[aruwiliatta … ]

§ 11'''

130 -- [ … ] ila[liš]kanzi

131 -- [kw]iēš=ma [ … ] BIBR[IḪI].A [ … ] UNUTEMEŠ ŠA [KÙ.BABBAR KÙ.BABBAR.GI4] danna šanḫiškanzi

132 -- kwiēš=(š)maš=z(a) A.ŠÀ A.GÀRḪI.A-KUNU GIŠKIRI6MEŠ.GEŠTIN-[K]UNU [ ... ] GIŠTIRMEŠ-KUNU tannattauwanzi šanḫiškanzi

133 -- kwiēš=(š)maš=z(a) LÚ.MEŠAPIN.LÁ LÚ.MEŠNU.GIŠKIRI6 MUNUSMEŠ NA4ARA5 tanna šanḫiškanzi

134 -- nu idālun tapaššan ḫinkan gaštan dUTU URUarinna GAŠAN-YA apēdaš ANA KUR.KURḪI.A LÚKÚR pāi

§ 12'''

135 -- nu=z(a) dUTU URUari[nn]a GAŠAN-YA zikila mukeškeḫḫu[t]

136 -- [ ... ]-za memi

137 -- wešuriyanz(a)=m[a] E[GIR-pa] ḫandaḫut

138 -- n=ašta ANA mmuršili LUGAL-i ANA ARAD-K[A] ANA KUR URUḫatti=ya a[n]da aššuli neišḫut

139 -- nu ANA mm[uršil]i ARAD-KA TI-tar ḫattulatar i[nna]rauwātar ŠA EGIR.UD-MI ZI-a[š lal]ukkiman [M]UKAM GÍD.DA=ya peški

140 -- [nu]=šši=kan [ ... ] anda lalukkiman [dušgara]tt[ann=a] zikki

141 -- nu=šši D[UMU-l]atar [ … ] DUMU.MUNUSMEŠ ḫaššuš ḫanzaššu[š] peški

142 -- nu=šši nūn tūmantiyan [peš]ki

143 -- nu=šši ḫalkiyaš GIŠ[GE]ŠTIN-aš [ … ]-aš GU4-aš UDU-aš ANŠE.KUR.RA-aš [DUMU.LÚ.U19.L]U-aš [m]i[y]atar peš[k]i

144 -- [ ... ]-tar tarḫuwi[l]ātar [ ... ] parā neyandan [ … ]

145 -- [nu]=šši KUR.[K]URḪI.A LÚKÚR [ŠAPAL GÌRMEŠ-Š]U zikki

146 -- [ ... -i]š[k]eddu

147 -- [ ... ] peran [ ... ]-ru

148 -- nu dUTU URUarinn[a ... KUR URUḫa]tti g[e]nzu [ ... ]

149 -- [n]=at=z(a) EGIR-an [ ... ]

150 -- [ ... ḫ]uwanduš [ ... ]

151 -- [ ... ]

152 -- nu šeišduwa[š] IM-anteš iyandaru

153 -- [ ... ] šeišdu

154 -- [n]u šumāš ANA DINGIRME[Š] NINDA.GUR4.RA-K[UN]U DUGišpantuz[i ... ] šar[ā a]r[t]ari

155 -- nu panku[š] apāt ē[šd]u ḫalzai

§ 13''''

156 -- [ … ]-na mugauwanzi [ ... ] tuppiyaš AWATEMEŠ apiya aniyanun

157 -- nu dUTU URUarinna URUKÙ.BABBAR-ši INA UD-7KAM mukeškenun

158 -- INA URUarinna INA UD-7KAM mukeškenun

159 -- n=ašta kī AWATEMEŠ anda memiškenun

160 -- mugauwaš=ma arḫayan ḫanti tuppi

§ 14''''

161 -- [ ... ark]uwa[r ... ]

§ 15''''

162 -- [ ... ] mān ŠÀ KUR URUGIDRU-t[i ... akk]iškettari

163 -- [... Ṭ]UPPA [ … ] ḫantī [ … ]

164 -- [m]ān dUTU URUarinn[a ... m]ugānzi

165 -- nu=šša[n ... ] anda memiškanzi

§ 16''''

166 -- [ ... ] mān KUR-e [ ... ]

167 -- [n]u=mu dUTU-ŠI [ … -]wa-[ ... ]

168 -- [n]u pāun DINGIRMEŠ [ ... UR]Uarinni URUz[ippalan- ... ]

169 -- [ … k]ī uddā[r ... ]

§ 17''''

170 -- [ ... mz]ūw[a- ... ]