index introductio imagines || partitura exemplar translatio

e-mail

CTH 378.2

Exemplar --

Citatio: E. Rieken et al. (ed.), hethiter.net/: CTH 378.2 (Expl. --, 07.09.2017)

§ 1

1 -- [dI]M URUḫatti BELI-YA [ … BEL]UMEŠ-YA

2 -- uiyat=mu mmurš[iliš … š]umēl ARAD-KUNU

3 -- īt=wa ANA dI[M] URUḫatti [B]ELI-YA Ù ANA DINGIRMEŠ BELUMEŠ-YA k[i]ššan memi

4 -- kī=wa kwit iyatten

5 -- nu=wa=kan INA ŠÀ-BI KUR URUḫatti ḫinkan tarnatten

6 -- nu=wa KUR URUḫatti ḫinganaz arumma mekki tamaštat

7 -- nu=wa PAN ABI-YA PAN ŠEŠ-YA akkišketat

8 -- kwitt=aya1=wa=z ammuk A[N]A DINGIRMEŠ LÚSANGA kišḫat

9 -- nu=wa kinunn=a ammuk peran akkiškettari

10 -- kāš MU-20KAM

11 -- kwit=kan INA ŠÀ KUR URUḫatti akkiškettari

12 -- nu=kan IŠTU KUR URUḫatti ḫinkan [a]rḫa UL=pat taruptari

13 -- ammuk=ma=z ŠÀ-az laḫlaḫḫiman UL taruḫmi

14 -- NÍ.TE-az=ma=z(a) pittuliyan namma U[L] taruḫmi

§ 2

15 -- namma=z(a) EZEN4ḪI.A=ya kuwapi ēššaḫḫun

16 -- nu ANA DINGIRMEŠ ḫūmandaš peran EGIR-pa iyaḫḫat

17 -- 1-EN É DINGIR-LIM=kan UL teḫḫun

18 -- nu=z(a) ḫing[a]ni šer ANA DINGIRMEŠ ḫūmandaš arkūwar ē[š]šaḫḫun

19 -- I[KRIBIḪI.A=ma=šmaš=ka]n [ ... ]-zaškenun

20 -- [ … BELUME]Š-YA [i]štamašten

21 -- [ … IŠTU KUR URUḫat]ti [ḫ]inkan [arḫa uiyatten]

22 -- [URUḫattuš]aš=wa [ ... ] taruḫzi

23 -- [ … akki]škettari

24 -- [ … SIxSÁ-at]taru

25 -- našma=wa!=at=z(a)=ka[n … ]

26 -- [ … LÚDINGIR-LIM-niya]nz(a)=ma memāu

27 -- DINGIRMEŠ=ma=m[u … ]

28 -- [ … KUR URU]ḫatti ḫinkan UL SIG5-at[tat]

29 -- [ … tamašt]at

§ 3

30 -- [ … Š]A DINGIRMEŠ-YA kwiēš LÚ.MEŠNINDA.GUR4.RA-[uš … ašša]nteš ešer

31 -- n=at akki[škantat]

32 -- [ ... memiya]š namma nakkišta

33 -- nu ŠA DING[IRMEŠ ... ]

34 -- [ … k]arūila DUB-2KAM.ḪI.A peran w[emiyanu]n

35 -- 1 ṬUPPU Š[A SISKUR ŠA ÍDmāla]

36 -- [karū]=ma=wa SISKUR ŠA ÍDmāla karuw[iliy]ēš LUGALMEŠ ḫi[n]k[an ḫarke]r

37 -- kwitman=ma IŠTU UDKAM-U[M] ABI-YA INA KUR URUḫatti a[kkiškettat]

38 -- [nu SISKUR Š]A ÍDmāla UL k[u]wapikki iyawēn

§ 4

39 -- [ŠANU ṬUPP]U=ma ŠA URUkuruštamma

40 -- LÚMEŠ URUkuruštamma maḫḫan d10 URUḫatti INA KUR URUmizri pē[d]aš

41 -- nu=šmaš dIM URUḫatti maḫḫan išḫiūl ANA LÚMEŠ URUḫatti menaḫḫanda iyat

42 -- namma=at IŠTU d10 URUḫatti li[n]ganuwanteš

43 -- nu LÚMEŠ URUḫatti kwit LÚMEŠ URUmizri=ya IŠTU dIM URUḫatti linganuwanteš ešer

44 -- nu wēr LÚMEŠ URUḫatti peran waḫnuēr

45 -- nu=kan NIŠ DINGIR-LIM LÚMEŠ URUḫatti ḫūdāk šarriyēr

46 -- nu ABU-YA ÉRINMEŠ ANŠE.KUR.RAMEŠ uiyat

47 -- nu ZAG KURmizri KURamga wal(a)ḫḫer

48 -- namma=ya uiyat

49 -- nu namma wal(a)ḫḫer

50 -- LÚMEŠ URUmizrī=ma maḫḫan naḫšariyantat

51 -- [n]amma uiēr

52 -- n=at wēr

53 -- nu ANA ABI-YA DUMU-ŠÚ LUGAL-wiznanni anku weker

54 -- nu=šmaš maḫḫan ABU-YA apēl DUMU-ŠÚ pēšta

55 -- n=an maḫḫan pēḫuter

56 -- n=an=kan kwēnner

57 -- ABU-YA=ma :kappilazzatta

58 -- n=aš INA KURmizri pait

59 -- nu KUR URUmizri wal(a)ḫta

60 -- ÉRINMEŠ=ya=kan ANŠE.KUR.RAMEŠ ŠA KURmizri kwenta

§ 5

61 -- nu apiya=ya dIM URUḫatti BELI-YA ABA-Y[A] ḫannešnit šarlāet

62 -- nu=z(a) ÉRINMEŠ ANŠE.KUR.RAMEŠ ŠA KUR URUmizri taruḫta

63 -- n=at=kan kwenta

64 -- nu LÚMEŠ appa[ndan] kwin ēpper

65 -- n=an maḫḫan INA KUR URUḫatti EGIR-pa uwatēr

66 -- nu=kan INA ŠÀ-BI LÚ.MEŠŠU.DAB.BIḪI.A ḫinkan kišat

67 -- n=aš a[k]kiškewan d[āiš]

§ 6

68 -- maḫḫan=ma LÚ.MEŠŠU.DAB.BIḪI.A INA ŠÀ-BI KUR URUḫa[t]ti arnuēr

69 -- nu=kan ḫingan INA ŠÀ-BI KUR URUḫatti LÚ.MEŠṢABTUTUM utēr

70 -- nu=kan INA ŠÀ KURḫatti apēzz(a) UDKAM-az akkiškettari

71 -- nu=z(a) maḫḫan eni ṬUPPA ŠA KUR URUmizri peran wemiyanun

72 -- n=at IŠTU DINGIR-LIM ariyanun

73 -- aši=wa kwiš memiyaš [I]ŠTU dIM URUḫatti iyanz(a)

74 -- LÚMEŠ URUmizri kwit LÚMEŠ URUḫatti=ya IŠTU dIM URUḫatti linganuanteš

§ 7

75 -- ddamnaššaruš=kan kwit INA ŠÀ-BI É dIM URUḫatti BELI-YA

76 -- memiyan=ma=kan LÚMEŠ URUḫatti=pat ḫūdāk šarriyēr

77 -- nu=war=aš mān ANA dIM URUḫatti BELI-YA kartimmiyaz kišat

78 -- n=at ḫandāettat

§ 8

79 -- SISKUR=ya ŠA Í[Dm]ā[l]a ḫingani šēr ariyanun

80 -- nu=mu=kan apiya=ya dI[M URUḫatt]i EN-YA peran tiyawanzi ḫandāettat

81 -- nu=z(a)=kan kāša [ … waš]tul tarnaḫḫun

82 -- ešzi=at

83 -- iyawēnn=[a=(a)t]

84 -- [ ... ] ammuk peran kišanz(a)

85 -- ANA PAN ABI-YA [ ... ]

86 -- [ ... ] anda imma šāggaḫḫi

87 -- [ ... ] memiyaš

88 -- nu=z(a) dI[M ... ] šer kartimmiyawa[nz(a)]

89 -- [ ... a]kkiškettar[i]

§ 9'

90 -- mān INA ŠÀ KUR URUḫa[tti akk]iškettari

91 -- nu=z(a) k[āša? AN]A dIM URUḫatti EN-YA [ ... apa]dda šer ēššaḫḫi

92 -- nu=tta [ḫ]aliḫliškemi

93 -- nu duddu ḫa[lziššaḫḫi]

94 -- [n]u=mu d10 URUḫatti EN-YA išdamaš

95 -- [n]u=kan INA ŠÀ KURḫatti ḫinkan daru[ptaru]

§ 10'

96 -- [nu]=z(a) uttar kwit arḫa ariyanun

97 -- [ … ] ḫingani šer kwe INIMMEŠ ḫandaettat

98 -- [n=a]t EGIR-pa lāiškemi

99 -- n=at=[kan ša]rninkiškemi

100 -- nu AWAT NI[Š DING]IR-LIM kwit ḫingani šer ḫandae[t]tat

101 -- nu SISKUR [N]IŠ DINGIR-LIM ANA d10 URUḫatti [ANA DINGIRMEŠ ENMEŠ-Y]A peran arḫa šipantaḫḫun

102 -- [ ... ] peran arḫa šipandaḫḫun

103 -- [ ... t]uk ANA d10 URUGIDRU-ti [ … š]er

104 -- SISKUR=ya=šmaš [ ... ]

105 -- SIS[KUR Š]A ÍDmāla=ma=mu [k]wi[t … š]er ḫandaettat

106 -- nu kāš[a ANA ÍDm]āla kwit iyaḫḫari

107 -- nu=mu d10 URUḫa[t]ti EN-YA DINGIRMEŠ BELUMEŠ-YA SISKUR ŠA ÍDmā[l]a EGIR-an tarnatten

108 -- nu SISKUR ŠA Í[Dmāl]a iyallu

109 -- n=at=kan ašnullu

110 -- iyami=at=(a)z kwedāni uddanī ḫingani šer

111 -- nu=mu DINGIRMEŠ BELUMEŠ-YA genzu datten

112 -- nu=kan INA ŠÀ KUR URUGIDRU-ti ḫingan lazziyattaru

§ 11'

113 -- dIM URUḫatti BELI-YA DINGIRMEŠ BELUMEŠ-YA kikkištāri QATAMMA

114 -- wašteškanzi

115 -- nu ABU-YA=ya waštaš

116 -- nu=kan ŠA dIM URUḫatti EN-YA memiyan zāyiš

117 -- ammuk=ma UL kwitki wašdaḫḫun

118 -- nu kikkištāri QATAMMA

119 -- ŠA ABU-ŠU=kan waštul ANA DUMU-ŠU ari

120 -- nu=kan ammuqq=a ŠA ABI-YA waštul ar(a)š

121 -- n=at=z(a)=kan kāša ANA d10 URUḫa[t]ti EN-YA Ù ANA DINGIRMEŠ BELUMEŠ-YA peran tarnan ḫarmi

122 -- ēšzi=at

123 -- iyawen=at

124 -- nu=z(a)=kan ŠA ABI-YA kwit waštul tarnan ḫarmi

125 -- nu ANA d10 URUḫatti EN-YA Ù ANA DINGIRMEŠ BELUMEŠ-YA ZI-anz(a) namma waršiyaddu

126 -- nu=mu genzu namma dātten

127 -- nu=kan IŠTU KUR URUḫatti ḫinkan arḫa namma uiyatten

128 -- nu=kan kēuš kwiēš LÚ.MEŠNINDA.GUR4.RA-uš LÚ.MEŠišpantuzziyaliuš tēpawēš āššanteš

129 -- n=at=mu lē akkanzi

§ 12'

130 -- nu=z(a) kāša ANA dIM EN-YA ḫingani šer arkūwar ēššaḫḫi

131 -- nu=mu d10 URUḫatti EN-YA ištamaš

132 -- nu=mu ḫwišnut

133 -- nu=tta[=kk]an ki[ššan ... ]

134 -- MUŠEN-iš=z(a)=kan GIŠtaptappan EGIR-pa ēpzi

135 -- n=an GIŠtaptappaš ḫuw[išnuzi]

136 -- našma mān ANA ARAD-TI kwedanikki kwitki na[k]kiyaḫḫa[n]

137 -- nu=z(a) ANA EN-ŠU arkuwar iyazzi

138 -- n=an EN-ŠU ištamašzi

139 -- nu=šši g[enzu … ]

140 -- kwit nakkiyaḫḫan

141 -- n=at=ši SIG5-aḫzi

142 -- našma mān ANA ARAD-TI kwedanikki waštul

143 -- waštul=ma=zz(a)=kan ANA PANI E[N-Š]U tarnāi

144 -- n=an EN-ŠU kwit apiya yēzzi

145 -- n=an yēzzi

146 -- waštul=ma=z(a)=ka[n] A[N]A PANI EN-ŠU kwit tarnāi

147 -- nu ANA EN-ŠU ZI-anz(a) waršiyazz[i]

148 -- [nu EN]-ŠU apūn ARAD-DI EGIR-pa UL kappuwezzi

149 -- [a]mmuk=z(a)=kan ŠA ABI-YA waštul tarna[ḫḫun]

150 -- ašān=at

151 -- iyanun=at

152 -- [mā]n šarnikziel kwiš

153 -- nu ap[ēz ḫinga]naz karū=ya kwit mekki [ ... ]

154 -- [ ... ] IŠTU KUR URUmizri kwin LÚ.MEŠ[ŠU.]DAB uwater

155 -- NAM.RAḪI.A=ya kwin [ … ]

156 -- [EGIR-p]a=ma kw[i]t URUḫattušaš ḫ[i]nganaz šarnikta

157 -- n=at 20-anki [UL k]arū apēniššan kišari

158 -- n[u] ANA dIM URUḫatti EN-YA [Ù AN]A DINGIRMEŠ BELUMEŠ-YA ZI-anz(a) UL=pat waršiyattari

159 -- našma=kan mān [amm]uk=ma kwitki šarnikziel ḫanti išḫiyattēni

160 -- [n=a]t=mu tešḫaz memiešten

161 -- nu=šmaš=at peḫḫi

§ 13'

162 -- [nu=tt]a kāša ammuqq=a ANA d10 URUḫatti EN-YA arkweškemi

163 -- nu=mu TI-nut

164 -- [nu=m]ān kēzz(a) kuwatqa uddānaz akkiškettari

165 -- n=at kwitman [EGIR-p]a SIG5-aḫḫiškemi

166 -- nu=kan ŠA DINGIRMEŠ kwiēš LÚ.MEŠNINDA.GUR4.RA LÚ.MEŠišpantuzzilašš=a [āšš]anteš

167 -- n=at lē namma akkanzi

§ 14'

168 -- [namma=m]a mān tamētazz=iya kwēzqa uddānaz akkiškettari

169 -- n=at=z(a)=kan naššu tešḫit uwallu

170 -- našma=at ariyašešnaz [ ...-y]attaru

171 -- našma=at LÚDINGIR-LIM-nianz(a)=ma memāu

172 -- našma ANA LÚ.MEŠSANGA kwit [ḫ]ūmandāš watarnaḫḫun

173 -- n=at=š(a)maš šuppaya šeškiškanzi

174 -- nu=mu d10 UR[Uḫa]tti EN-YA ḫuwišnut

175 -- nu=z(a) DINGIRMEŠ BELUMEŠ-YA [ ... ]

176 -- nu=z(a) DINGIRMEŠ BELUMEŠ-YA parā ḫandandatar tikkušnuwandu

177 -- n=at=z(a)=kan apiya kwiški tešḫit aušdu

178 -- nu kwēzz(a) uddānaz akkiškettari

179 -- n=at wemiyattaru

180 -- nu=kan URUDUZI.[KI]N.BAR-aš GIŠšarpaz kunkuweni

181 -- nu=mu dI[M UR]Uḫatti [E]N-YA [T]I-nut

182 -- nu=kan ḫinkan [I]ŠTU KUR URUḫatti arḫa namma [taru]pdāru

§ 15'

183 -- DUB-1KAM QATI

184 -- mmuršil[iš=z(a) ... ] ḫingani še[r arkuw]ar [ … ]